ភ្នំពេញ៖ មន្ទីរធម្មការ និងសាសនារាជធានីភ្នំពេញ នាថ្ងៃទី២១ ខែមីនា ឆ្នាំ២០២៤ បានចុះទៅដល់ផ្ទះគ្រូចាប់សរសៃ និងគ្រូវ័យក្មេងដែលល្បីថាអាចមើលឃើញភពទាំង៣ និងឃើញអមនុស្ស ណែនាំឱ្យបញ្ឈប់បង្ហោះសកម្មភាពទស្សន៍ទាយ សម្ដែងអភិនីហារ ដោះអំពើ។

កាលពីថ្មីៗកន្លងទៅនេះ គ្រូចាប់សរសៃ និងមានកូនស្រីអាចមើលឃើញភពទាំង៣ បានធ្វើសកម្មភាពទស្សន៍ទាយ និងសម្តែងអភិនីហារផ្សេងៗ ដែលនាំឱ្យប៉ះពាល់ដល់សណ្ដាប់ធ្នាប់ សេចក្ដីថ្លៃថ្នូរសង្គម តាមរយៈបណ្ដាញសង្គមនានា។

គ្រូចាប់សរសៃ និងកូនស្រីបានយល់ព្រមចុះកិច្ចសន្យាជាមួយលោកប្រធានមន្ទីរធម្មការ និងសាសនារាជធានីភ្នំពេញ​។

ជាមួយគ្នានេះអំពាវនាវដល់មហាជនដែលប្រើប្រាស់បណ្តាញសង្គមទាំងអស់ សូមបញ្ឈប់ការយកវីដេអូទាំងចាស់ ទាំងថ្មីរបស់លោក និងកូនស្រីកន្លងមកទៅបង្ហោះចែកចាយនៅលើបណ្ដាញសង្គមបន្តទៀត ប្រសិនបើមិនបញ្ឈប់ទេ នឹងត្រូវទទួលខុសត្រូវចំពោះមុខច្បាប់ជាធរមាន។

គូសរំលឹកថា កន្លងមកក្រសួងធម្មការ និងសាសនាក៏បានចាត់វិធានការដោយចុះទៅណែនាំ និងឱ្យបុគ្គលមួយចំនួនដែលឆ្លៀតឱកាសយកសាសនាព្រះពុទ្ធធ្វើជាអាជីវកម្ម និងទទួលបានផលលាភផ្សេងៗ ឱ្យបញ្ឈប់សកម្មភាពជាបន្ទាន់៕